2º Certame de Relatos Manuscritos.
Peruchela Edicións anuncia o fallo do xurado do 2º Certame de Manuscritos
O pasado 8 de agosto fixéronse públicos en Monforte de Lemos os resultados do 2º Certame de Relatos Manuscritos, un evento organizado por Peruchela Edicións que busca fomentar a escrita a man e poñer en valor o talento literario de persoas adultas e do público infantil.
Este ano presentáronse 35 relatos, unha participación lixeiramente superior á da primeira edición, na que concorreran 30 traballos. Na categoría Infantil pasouse de 4 obras a 6, mentres que a categoría de Adultos reuniu 29 relatos chegados tanto da comarca e doutros puntos próximos como de comunidades máis afastadas, como Madrid ou Asturias.
A maioría das obras presentadas foron redactadas en castelán. Porén, na categoría de Adultos os tres premios recaeron en textos escritos en galego, e na Infantil tanto o primeiro como o segundo premio foron tamén para relatos nesta lingua.
O xurado, composto por Pilar Silvosa, Luis Castro e Manuel Fusaiola, todos eles vencellados ao mundo da cultura e das letras, salientou a calidade das obras gañadoras e indicou que, aínda que os primeiros postos se destacaron claramente, houbo puntuacións moi axustadas entre outros finalistas, o que requiriu unha deliberación coidadosa.
Premios outorgados
🏆 Adultos:
1º Iria Rodríguez – Historias do muíño
2º Xesús Parada – Cando florece a piorniña
3º Rosa Noriega – O corazón de Maya
🌟 Infantil:
1º Suevia Villalda – A miña amiga cegoña
2º Antón Nieves – A cidade dourada
3º Eva Freire – La luna llena
Publicación do libro coas obras participantes
Todos os participantes recibirán nas vindeiras semanas, de forma gratuíta, un exemplar do libro que recolle todos os relatos desta edición, incluíndo o seu propio. Quen o desexe poderá adquirir exemplares adicionais ao prezo de 10€ en librarías do País.
A entrega oficial de premios celebrarase en canto o libro saia da imprenta, e Peruchela Edicións anunciará a data con antelación.
A directora executiva e organizadora do certame, Mª Rocío Rodríguez López, amosou a súa satisfacción pola diversidade das propostas recibidas e destacou que para a editorial “é fundamental promover a escrita a man, unha práctica que nos distingue e que queremos preservar”. Ademais, avanzou que para a vindeira edición o certame ampliarase, permitindo a presentación non só de relatos, senón tamén de poesía, teatro e calquera outro xénero literario.